第一日返工

小弟洲墓魂加入殯儀行業已經有20年坦白講入咗呢一行真係出唔返嚟~ 20年前機緣巧合睇到報紙殯儀館(大圍)請服務生,咁我就膽粗粗懷着戰戰兢兢嘅心態去見工,我記得見工當日係落大雨時間係下晝15:10,從未有白事嘅經驗嘅我(未死過親人),只會係三色台同電影裏面知道有關嘅事情,去到殯儀館真係有啲怯,但原來依間殯儀館比起我心目中同其他以前喺電視見到嗰啲實在有太大嘅分別,因為佢係新式殯儀館參照左台灣嘅設計去到個感覺就好似去咗酒店一樣,是次招聘有30人面試,最後喺耶穌保佑之下挑選左我,而我就開始咗我嘅殯儀生涯,等咗半個月之後公司就打咗俾我話已經正式聘請我叫我去簽合約,流程同一般公司冇太大分別~

其實都有心理準備殯儀行業應該都要返好早☀️,誰不知係早到7:00要返到,當年20出頭嘅我已經同兩個朋友仔夾份出嚟租咗個地方住,因為平嘅問題我哋當年係選擇咗天水圍😌~每日5:30起身轉三程車先返到去公司,但係為咗搵食都冇辦法,同埋覺得呢份工可以知道好多鮮為人知嘅秘密,所以繼續堅持落去,第一日順利地7:00前就返到去,去到人事部報道之後就有同事(老屎忽)帶我四周圍去參觀,其實見工嘅時候都有介紹過我要輪間,早,中,通宵😱~你冇睇錯係喺殯儀館過夜!(勁多古怪事之後會再講比大家分享),講返我呢份神職人員嘅工作(服務先人),早間係負責協助喪禮出殯流程,流程不外乎都係道教嘅就係擔返買水,教會嘅就係安息禮拜等等,帶領客人瞻仰遺容,禮成後在祭枱攞先人張大相比家屬,都係啲手板眼見功夫easy job 😎~

就係咁我就返咗一個月早間,係呢個月裏面,以我嘅鬼仔性格已經同各大部門人員混熟,仲有講有笑添~之後我就要經歷我第一次喺殯儀館嘅考驗(就係忍笑),雖然生老病死係一個必經階段但係親人離世嚟到殯儀館亦唔會係一件開心事,但往往喺殯儀館會見到啲笑到收唔到聲嘅case~

是咁的有一個早上,我如常我嘅工作負責一個堂口嘅出殯,當曰係出10-11,我9:30就到左房口,當我到咗房口之後我就見到傳說中半桶水殯儀經紀,(佢年約50歳男士典型福建佬一個),佢嘅事蹟行內人無人不知,當日如常繼續我嘅工作入到靈堂入邊小心地打點,但氣氛好凝重孝子賢孫們不停地哭,當日係採用道教儀式擔返買水,一如以往嘅流程做到最後瞻仰遺容,孝子賢孫們哭得更加厲害,當時半桶水經紀就諗住攞表現,喺祭品當中抽了先人最鍾意食的生果(香蕉)交給孝子們,經紀叫孝子們叫先人食飽好上路,經紀叫大家一齊跟住佢嗌(老竇食蕉啦)~當時我真係忍唔到笑,真係笑咗出嚟但好彩冇人睇到,大家試想想當時嘅畫面,個個哭成淚人,但係又要講(老竇食蕉啦~嗚嗚)嗰個畫面真係笑到收唔到聲~呢個係我嘅親身經歷。

跟住落嚟分享多個半桶水經紀嘅笑話~

有一次根據當時在場的喃嘸先生憶述返俾我哋聽,有個主家(女士60歲左右個樣朦朦地)收到一封吉儀,主家問個經紀要點處理的,(吉儀入邊有紙巾,糖,$1)。

係依度都簡單解釋吓佢哋嘅用意先,紙巾係用黎抹走眼淚,糖係如意甜頭咁解,去個殯儀館做白事嘅地方要攞返啲甜頭,$1係回禮代表白事唔要多,一次就夠啦~順便一提去完殯儀館喺樓下記住攬一攬火,之後唔好直接返屋企,喺屋企樓下個商場兜兩個三個圈先至好返去啊~等啲污糟野👻唔好跟到你~

好啦講返呢個半桶水經紀先,
主家:請問吉儀點處理吖?
經紀:紙巾攞嚟抹眼淚,粒糖用咗佢啦,一蚊呢就食咗佢攞返啲甜頭(粗福建口音嘅廣東話)
當時喃嘸先生都唔覺有啲咩問題,但望到主人家個樣好大個問號~但都冇再問落去,就返返埋位繼續摺金銀,隔咗一陣喃嘸先生見嗰個主人家開咗封吉儀,之後將個一蚊擺咗落口,跟住佢行返埋去個經紀度問,咁個一蚊幾時先攞返出嚟吖,嗰陣時喃嘸先生憶述當時真係咬到牙肉都出埋血嚟忍笑,之後個經紀話而家都得㗎啦~呢個係佢其中一個經典~